Nám í endurnýjanlegri orku er einstakt tækifæri fyrir nemendur í verkfræði, raunvísindum og hagfræði til að sérhæfa sig á sviði endurnýjanlegra orkugjafa. Mikil tækifæri felast í rannsóknum og þróun á endurnýjanlegum orkugjöfum, bæði á Íslandi sem og á heimsvísu, og ljóst að sjálfbær orkunýting mun verða eitt af stóru verkefnunum á þessari öld.
Um námið
Námið er vel til fallið fyrir nemendur sem stefna á starfsferil á sviði jarðhitaverkfræði, vatnsaflsverkfræði, raforkuverkfræði, jarðvísinda, og umhverfis- og auðlindafræði.
Nemendum gefst tækifæri til að vinna verkefni tengd endurnýjanlegri orku með sérfræðingum sem eru fremstir á sínu sviði, t.d. á sviði jarðhita, vatnsafls, raforku, og sjálfbærni.
Nemendur fá m.a. kynningu á þeim endurnýjanlegu orkugjöfum sem eru virkjaðir hér á landi með kennslu og vettvangsferðum með sérfræðingum innan sviðsins í inngangsnámskeiði í endurnýjanlegum orkufræðum.
Einnig fá þeir tækifæri til þess að vinna með fyrirtækjum hérlendis sem eru leiðandi á sviði endurnýjanlegrar orku í þverfaglegu verkefnanámskeiði þar sem nemendur með mismunandi bakgrunn í verkfræði, raunvísindum, orkuhagfræði, umhverfis- og auðlindafræði, vinna saman í hópum.
