Doktorsnám í íslenskum bókmenntum er 240 einingar og tekur fjögur ár miðað við fullan námshraða. Stundi doktorsnemi námið að hluta má námið taka allt að sex ár. Ef ekki tekst að ljúka náminu á tilskildum tíma getur doktorsnemi sótt um undanþágu frá tímamörkum til framhaldsnámsnefndar. Verði undanþága veitt má setja þau skilyrði að doktorsnemi uppfylli þær kröfur sem þá eru í gildi um doktorsnám þótt hann hafi hafið námið meðan aðrar reglur giltu.

Skipuð er doktorsnefnd sem í sitja leiðbeinandi og tveir fastir kennarar eða viðurkenndir sérfræðingar á fræðasviðinu. Þeir sem sitja í doktorsnefndum skulu hafa doktorspróf eða jafngildi þess. Doktorsnemum skal tryggður reglulegur aðgangur að leiðbeinendum. Þeir skulu hvattir og studdir til að sækja um styrki úr rannsóknasjóðum. Framhaldsnámsnefnd getur gert kröfu um að nemandi í doktorsnámi ljúki tilteknum námskeiðum til að styrkja bakgrunn sinn, til dæmis í meistaranámi í íslensku við Háskóla Íslands eða erlenda háskóla. Leiðbeinandi nemanda gerir þá tillögu að áætlun fyrir þennan hluta námsins og leggur fyrir framhaldsnámsnefnd. Ekki síðar en við lok fyrsta misseris gerir doktorsnemi nákvæma áætlun um rannsóknarefni, námshraða. Æskilegt er að nemandi dvelji erlendis (sæki námskeið, vinnufundi, málþing, ráðstefnur) í samráði við leiðbeinanda. Námsáætlun skal samin í samráði við leiðbeinanda og staðfest af framhaldsnámsnefnd. Doktorsnemi skal þá jafnframt skila til framhaldsnámsnefndar lýsingu (prospectus) á væntanlegu rannsóknarefni og verja hana á málstofu. Í lýsingunni skal gera grein fyrir viðfangsefninu, þeim spurningum sem bornar verða upp og rannsóknaraðferðinni. Lýsingunni fylgi drög að heimildaskrá. Við lok þriðja og fimmta misseris skal leiðbeinandi skila framvinduskýrslu um doktorsnámið til framhaldsnámsnefndar. Framvinduskýrsluna skal ræða á fundi með nemanda. Sé framvinda ekki samkvæmt áætlun og engar frambærilegar skýringar eru á töfum getur framhaldsnámsnefnd fellt niður skráningu nemandans í námið. Nemandi þarf þá að endurskrá sig í námið. Sé þætti leiðbeinanda ábótavant mun framhaldsnámsnefnd ræða við hann.

Leitast skal við að veita doktorsnemum tækifæri til kennslu við Háskóla Íslands. Þeim skal boðið upp á rannsóknar- og vinnuaðstöðu. Doktorsnemar skulu taka virkan þátt í því vísindasamfélagi sem þeir hafa gerst aðilar að. Þeir skulu sækja reglubundnar málstofur þar sem þeir kynna rannsóknarverkefni sín fyrir öðrum framhaldsnemum og kennurum. Doktorsnemar skulu eiga þess kost að sitja vísindaráðstefnur og kynna verkefni sín þar. Leita skal leiða til að afla doktorsnemum námsstyrkja.

Doktorsnemi lýkur rannsóknum sínum með því að semja ritgerð, sem skal alla jafnan vera 75.000-100.000 orð. Í doktorsritgerð skal tekið til rannsóknar afmarkað og samstætt viðfangsefni og það kannað rækilega með viðurkenndum fræðilegum aðferðum. Niðurstöður verður að setja fram skýrt og aðgengilega. Grundvallarkrafa í fræðimennsku er virðing fyrir heimildum og skulu doktorsnemar undantekningalaust geta þeirra heimilda sem þeir nota. Við gerð heimildaskrár og tilvísana skal farið eftir viðurkenndum reglum. Doktorsritgerðir skulu varðar í heyranda hljóði. Ritgerðirnar skulu kynntar rækilega, birtar og gerðar aðgengilegar alþjóðlegu fræðasamfélagi. Doktorspróf í íslenskum bókmenntum að undangengnu doktorsnámi samkvæmt reglum þessum veitir lærdómstitilinn philosophiae doctor (Ph.D.).